ඔබේ හඳහන අනුව

Week of මැයි 17, 2019

තුංමෝදර නිමාලි පිළිතුර

කන්‍යා ලග්න කන්‍යා නවාංශක විසා නැකත දැනට දසාව බුධ ලග්නය වර්ගෝත්තම වීම ඉතා සුභදායකයි. ලග්නාධිපති දුර්වලව 8 වැන්නා වූ මාරක ස්ථානයේ උපතේදී ස්ථාපිතවීම එතරම් සුභදායක නැත. රැකියා ස්ථානයේ අධිපති වන්නේද බුධයි.

මෙම ස්ථාන දෙකටම බුධගේ දෘෂ්ඨිය නොමැති වීමද පාඩුවකි. මාතෘකාරක, චිත්තකාරක සඳු තනිවී දෙවැන්නේ සිටීමෙන් කේමදෘම යෝගයද උදාවි ඇතත් එයද භංගවී නොමැත. මෙම පිහිටීම් සුභවාදි නොවේ. නිතර සිතට වදදෙන ගැටලු පැනනැගීමටත් සිත් කලකිරීම් වලටත් හේතු වේ. 10 වැන්න හා 8 වැන්න අතර පරිවර්තන යෝගයක්ද ස්ථාපිතව ඇත.

කුමන රැකියාවක් කළත් ඊට බාධාකාරි තත්ත්වයන් ඇති විය හැක. රැකියාවෙන් තෘප්තියක් ලබා ගැනීමත් අසීරුවිය හැක. රජයේ රැකියාවකට ළංවීමේ හැකියාවද විරලය. රාජ්‍ය කාරක රවිද 10 වැන්නට සම්බන්ධයක් නැත. උසස් අධ්‍යාපන බලාපොරොත්තු ද කඩවන්නට ඇති බව පෙනේ. ඉතා ඉවසීමෙන් කල්පනාකාරිව රැකියා කටයුතු නොකළහොත් ඔබට රැකියා කිහිපයකටම මාරුවන්නට සිදුවේවි. ඉවසීමෙන් කටයුතු කළහොත් දියුණුවක් බලාපොරොත්තු විය හැක.

 

පිටබැද්දර දීපිකා පිළිතුර

වෘෂභ ලග්න කටක නවාංශක පුවපල් නැකත දැනට දසාව කුජ අධ්‍යාපනය ගැන සලකා බැලීමේදී 5 වැන්න හා 9 වැන්න සුභ තත්ත්වයෙන් පවතින බව පෙනේ. පස් වැන්න අධිපති බුධ උපතේදි 9 වැන්නේ ස්ථාපිතව සිටී.

එසේම 9 වැන්නා අධිපති ශනිද අයස්තාවය වූ 11 වැන්නේ සිටී. මෙම තත්වයන් දෙකද උසස් අධ්‍යාපනයට යහපත්ය. එහෙත් 22 වන දෙර්කාණාධිපති සඳු බලවත් ලෙස පීඩාකරන බැවින්, උසස් පෙළ සමත් වුවත්, විශ්ව විද්‍යාල ප්‍රවේශය ගැන සැක සහිතයි. විභාගයට පෙර සඳු වෙනුවෙන් බෝධි පුජා 7 ක් වත් කළ හැකි නම් ( මේ සඳහා සඳුදා දින තෝරා ගන්නේ නම් වඩාත් යහපත් වේ) ඉතා හොඳයි.

රාජ්‍යකාරක රවි සතුරුව රැකියා ස්ථානයේ උපතේදී ස්ථාපිතවීමත්, රජයේ රැකියාවකට බාධාගෙන දීමකි. කෙසේ වෙතත් උසස් අධ්‍යාපනය ලබා පුද්ගලික අංශයේ හෝ අධ්‍යාපන ක්ෂේත්‍රයට සම්බන්ධ වෘත්තියකට ඔබට හිමිකම් ඇති බව පෙනේ. 

හඟුරන්කෙත සංජීව පිළිතුර

කන්‍යා ලග්න මිථුන නවාංශක සිත නැකත දැනට දසාව රාහු, දැනට පමාවීමක් නැතත් ඔබ සිතන ආකාරයට ඉක්මන් විවාහයකට යා නොහැක. එසේ වුවහොත් එහි අනිසි විපාක ඉදිරියේදී විඳින්නට සිදුවේවි. කෙසේවෙතත් මෙම දසා කාලය තුළම ඔබට ඔබේ සහකාරි හමුවේවි. ඔබ පදිංචි ප්‍රදේශයට බොහෝ ඈතින් ඊසාන දෙසින් සහකාරිය හමුවන්නට පිළිවන.

 විවාහ ස්ථාන අධිපති දුෂ්ඨ ස්ථානයක් වූ 12 වැන්නේ උපතේදී පිහිටීම සුභදායක නැත. විවාහය පමාවීමට මෙයද හේතුවක් විය හැකිය. දායාද ගැන බලාපොරොත්තු තබා නොගන්නේ නම් මැනවි. යුගදිවිය යහපත්ව පවත්වාගෙන යාමට මහත් වෙහෙසක් ගන්නට සිදුවේවි. පවුලේ සාමයට බාධා ගෙන දෙන සිදුවීම් වලින් ප්‍රවේසම්ව කටයුතු කළ හොත් අනාගතය සුභදායක වේවි. 5 වැන්න වූ පුත්‍ර ස්ථාන අධිපති ශනි දුර්වල වීමත් පුත්‍රකාරක ගුරු සතුරු වීමත් පුත්‍ර ස්ථානය නොදැකීමෙන් දරුපල වලට අසුභවාදීව බලපාන්නට පිළිවන. කෙසේ වෙතත් ලැබෙන බිරිඳගේ එම තත්ත්වයන් බලවත් වුවහොත් එම අඩුපාඩුවද මඟහරවා ගන්නට පිළිවන.

උඩුකාව සමින්දි පිළිතුර

ධනු ලග්න කන්‍යා නවාංශක පුවපල් නැකත දැනට දසාව රාහු, පංච මහා පුරුෂ යෝග දෙකකින් වර්ණවත්ව ඇති ඔබේ ජන්මය ඉතා බලවත් බව පෙනේ. ගුරුගෙන් හංස යෝගයෙන් බුධගෙන් භද්‍රයෝගයක් පමණක් නොව බුධ ආදිත්‍යය යෝගයද උදාකරගනිමින් අධ්‍යාපන ක්ෂේත්‍රයේ මහා පෙරළියක් කර ගැනීමට වාසනාව ඔබට ඇත. දැනට ගත කරන දසාව එතරම් සුභදායක නොවුවද, ජන්ම පත්‍රයේ බලවත් බව නිසාම එතරම් අපලකාරි බවක් නොපෙනේ. අධ්‍යාපන ක්ෂේත්‍රයේම බලවත් වෘත්තියකට හිමිකම් ඇත.

ආශ්‍රය කරන අය අතර, මෙන්ම වෘත්තීය ස්ථානයේද ජනපි‍්‍රයත්වයට පත්වන අතර, ඔබෙන් උපදෙස් ගන්නට පෙළඹෙන අයද දිනෙන් දින වැඩිවනු ඇත. දැනට බලවත් විවාහ යෝග නැකත් ඉතා යහපත් විවාහයක් හා යුග දිවියක් ඔබට උරුම බව පෙනේ. එහෙත් විවාහය සඳහා තව ටිකකලක් ඉවසන්නට සිදුවේවි. පමා වුවද වාසනාවන්ත විවාහයකි. ඔබ වෘත්තියක නියැලෙන්නේ නම් සහකරුද එහිම සිටින්නට පිළිවන. එහෙත් ජන්ම පත්‍ර ගලපා විවාහ වන්නේ නම් ඉතා යහපත් ය. විවාහ දෝෂ නැත. දරුපලද ඉහළ තලයක පිහිටා ඇත. වාසනාවන්ත බලවත් ජන්ම පත්‍රයකි.

Week of මැයි 17, 2019