අවුරුදු එනවා එරබදු පිපිලා

කජු පුහුලන් ගස්වල පැණි පිරිලා

බැද්දට නගරෙට මල් වැහි වැහැලා

කොරෝන බාධක රටටම යෙදිලා

කොහෝ කොහෝ නද දෙන මී බින්දු

තවත් වෙනස් සියොතුන්ගේ සින්දු

ඔංචිලි පදිමින් රූබර ලන්දු

අවුරුදු සමයේ සරසවි කැන්දු

උන වෙඩි රතිඤ්ඤා සිව් දෙස සද්දේ

ඔංචිලිවාරම් රබාන සද්දේ

ළං වෙන විට පැතිරේ අවුරුද්දේ

මොනවා තිබුණත් කොරෝනා යුද්දේ

බක් මාසේ මැද වසන්ත කාලෙට

හිරු දෙවියෝ එති මීනෙන් මේෂෙට

මත්පැන් හොඳ නෑ ගන්නට ගේකට

එතැනයි අවුරුදු සැනසේ මේ රට

ජාතික මෙන් බුදු සමය අතින්

බක් පසළොස්වක බැතිනි සිතින්

අරමුණු කර උත්සවද බැතින්

පවත්වමුද හොඳ නේද ඉතින්

සුබ නැකතට හැම දෙය සිදුවෙනවා

අවුරුදු සුවිසෙස් බත වළඳනවා

මව් පිය වැඩිහිටියන් සලකනවා

සිරිත් විරිත් යුතුකම් ඉටුවෙනවා

සොබා විපත් රෝදුක් නොම වේවා

ලාහෙන් මල්ලට කෙත් සරු වේවා

තෙරුවන් මුරුවන් පිහිට ලැබේවා

සැමටම සුබ නව වසරක් වේවා

කිවිපති ඡ්‍යොතිෂ ඉඳුවර

අමුවල අමරසේන