දෙවියන්ගේ කැමැත්ත විමසූ චීන පේන කලාව

මැයි 10, 2024

ඡ්‍යොති‍ෂයේ ගොඩනැඟීමට ගැඹුරු දාර්ශනික පදනමක් ඇත. ඡ්‍යොතිෂය චීනයේ තවමත් පවතින පැරණිතම දර්ශනයකි. පැරැන්නන්ට අවශ්‍ය වූයේ මානව කටයුතුවල වෙනස්කම් සහ දේවල් සංවර්ධනය කිරීමේ නීති සොයා ගැනීමටය. එලෙසින් පුරාණ චීනයේ ඡ්‍යොතිෂ ශාස්ත්‍රය භාවිත කර ඇත්තේ රටවලට සිදුවන දේ, යුද්ධවල ප්‍රතිඵල, ආර්ථික ප්‍රවණතා සහ තවත් බොහෝ දේ පුරෝකථනය කිරීමටය. චීන ඡ්‍යොතිෂය යනු ජාතික සිදුවීම් පුරෝකථනය කරන රාජකීය ශාස්ත්‍රයකි. මේ ඡ්‍යොතිෂ ශාස්ත්‍රීය න්‍යාය සාමාන්‍යයෙන් සියලු‍ම ජීවීන්ට අදාළය. ඒවා 'විපත්ති වසර”‍, 'ආපදා අවුරුදු', 'නරක වසර'‍ වැනි ප්‍රධාන සමාජ සිදුවීම් ප්‍රකාශ කරයි.

මේ 2024 චන්ද්‍ර අලු‍ත් අවුරුද්ද චීනයට මකරාගේ වසරයි. මකරෙකුට ආදරය නොකරන්නේ කවුද? ඔවුන් දරුණුය, බුද්ධිමත්ය, ඉන්ද්‍රජාලිකය එමෙන්ම විනෝදජනක ය. මකරා වාසනාවන්තම රාශිය ලෙස චීන ජනයා සලකති. එය ප්‍රඥාව, බලය සහ ශක්තිය සංකේතවත් කරයි. කෙනෙකුගේ ඉරණම ගණනය කිරීම උපන් දිනය, උපන් සමය සහ උපන් පැය මත පදනම් වේ. චීන ඡ්‍යොතිෂ ශාස්ත්‍රය සාම්ප්‍රදායික චීන තාරකා විද්‍යාව සහ චීන දින දර්ශනය මත පදනම් වූවකි. එසේම චීන ජ්‍යෝතිෂ ශාස්ත්‍රය චීන දර්ශනය සමඟ සමීප සම්බන්ධයක් ඇත. එය අහස, පොළව සහ මිනිසා යන ත්‍රිත්වයේ සුසංයෝගකි.

චීන රාශි චක්‍රය චීන සංස්කෘතියේ වැදගත් සාධකයකි. චීන රාශි චක්‍රය චීන දින දර්ශනය මත පදනම් වසර 12 ක චක්‍රයක් ඉතා දිගු කාලයක් තිස්සේ භාවිත කර ඇත. පොදුවේ ගත් කල, රාශි චක්‍රය මිනිසුන් ඔවුන්ගේ ජීවිත ගත කරන ආකාරය පිළිබඳ මාර්ගෝපදේශ සපයයි. චීනයේ සංස්කෘතියට සහ ප්‍රජාවට බලපෑම් කිරීමේදී චීන රාශි චක්‍රය ඉතා වැදගත් කාර්යභාරයක් ඉටු කරයි. කෙනෙකුගේ පෞරුෂය ඔවුන්ගේ රාශි චක්‍රයේ සත්වයාගේ ගුණාංගවලට සම්බන්ධ බව චීන ජනප්‍රවාදවල මතයයි. චීනයෙන් ආරම්භ වූ රාශි චක්‍රය සහ එහි වෙනස්කම් ජපානය, දකුණු කොරියාව, වියට්නාමය, සිංගප්පූරුව, නේපාලය, භූතානය, කාම්බෝජය සහ තායිලන්තය වැනි බොහෝ නැඟෙනහිර ආසියානු සහ අග්නිදිග ආසියානු රටවල ජනප්‍රියව පවතී.

චීන සංස්කෘතියට රාශි චක්‍රයේ ඇති වැදගත්කම නම් සත්ව සලකුණු කථා සහ ජනප්‍රවාදවල භාවිත කිරීමයි. එක් එක් සත්ත්වයා සමඟ නිරූපිත විවිධ පෞරුෂ ලක්ෂණ වර්ධනය විය. චීන රාශි චක්‍රයේ සතුන් 12 චීනයේ වසර නියෝජනය කිරීමට පමණක් නොව, මිනිසුන්ගේ පෞරුෂය, වෘත්තීය, ගැළපුම, විවාහය සහ වාසනාව කෙරෙහි බලපෑම් කරන බව විශ්වාස කෙරේ. චීන දින දර්ශනයට අනුව, ඔබ උපන් වර්ෂය ඔබේ පෞරුෂය තීරණය කළ හැකිය. ඒ සෑම වසරකම චීන රාශි චක්‍රයක් ලෙස හැඳීන්වෙන සතෙකු විසින් නිරූපණය කරන බැවිනි. එම ලකුණ යටතේ උපත ලබන පුද්ගලයන්ට සත්වයාට සමාන ගති ලක්ෂණ පවතින බව විශ්වාස කරයි. පුද්ගලයෙකුගේ කේන්දරය, පෞරුෂය සහ ආදරය ගැළපුම ඒ පුද්ගලයාගේ චීන රාශි චක්‍රය සමඟ සමීපව සම්බන්ධ වී ඇති බව චීන ජනතාව විශ්වාස කරති. එය ඔහුගේ උපන් වර්ෂය අනුව තීරණය වේ.

චීන රාශි චක්‍රය, රාශි චක්‍ර සතුන් 12 කින් නියෝජනය වේ. අනුපිළිවෙලින් ඒවා නම් මීයා, ගොනා, කොටියා, හාවා, මකරා, සර්පයා, අශ්වයා, එළුවා, වඳුරා, කුකුළා, බල්ලා සහ ඌරා ය. චන්ද්‍ර අලු‍ත් අවුරුද්ද, නොහොත් වසන්ත උත්සවය, එක් සතෙකුගෙන් ඊළඟ සතෙකුට සංක්‍රමණය වීම සනිටුහන් කරයි. 2023 ජනවාරි 22 වැනි දින සිට ආරම්භ වී 2024 පෙබරවාරි 9 වැනි දිනෙන් අවසන් වූයේ හාවාගේ වසරකි. 2024 පෙබරවාරි 10 වැනි දිනෙන් ආරම්භ වී 2025 ජනවාරි 29 වැනි දිනෙන් අවසන් වන්නේ මකරාගේ වසරයි.

චීන ඡ්‍යොතිෂයේ අනාවැකි කීම පදනම් වී ඇත්තේ තාරකා මණ්ඩල විසි අටක් මතය. පේන කීම යනු මිනිසුන්ට දෙවිවරුන්ගෙන් ක්‍රියා උපදෙස් ඉල්ලා සිටීමට හෝ දෙවියන්ගේ හැඟීම් සහ කැමැත්ත ලබා ගැනීමට මාධ්‍යයකි. මේ ආකාරයේ මායා කර්මවලට දිගු ඉතිහාසයක් ඇත. පුරාණ චීනයේ පේන කීම සහ මන්තර ගුරුකම් ඉතා දියුණු වූ බව පෙනේ. පේන කීමේ වස්තූන් අතරට ඉර හඳ, කුරුල්ලන් සහ සතුන්, වෘක්ෂලතා සහ ධාන්‍ය වැනි සියලු‍ වර්ගවල ස්වාභාවික වස්තූන් ඇතුළත්ය. ඉබ්බා කටු පේන කීම, මුදල් පේන කීම, සත්ව පේන කීම, ඉර, සඳු සහ තරු පේන කීම ජ්‍යෝතිෂය ලෙස හැඳීන්වේ. කැස්බෑ පේන කීම සහ තරු පේන කීම අධිරාජ්‍යයා වෙනුවෙන් යෝජනා ඉදිරිපත් කිරීමට පුරාණයේ යොදාගෙන ඇතිබව විශ්වාස කරයි. ඇමතිවරු මහරජතුමාගෙන් යමක් කරන්ට හෝ නොකරන්නට කීවත් දෙවියන්ගේ කැමැත්තෙන් අදහස් ප්‍රකාශ කළහ. නුසුදුසු උපාය මාර්ග නිසා සිදුවන පාඩුවල අවදානම ද මෙමගින් මඟ හැරේ. පැරැන්නේ චීන උසාවි මඟින් ඡ්‍යොතිෂ ශාස්ත්‍රඥයින්ගේ අනාවැකි සාවද්‍ය නම් ඔවුන් ඝාතනය කරන ලදී, බොහෝ ඡ්‍යොතිෂ ශාස්ත්‍රඥයින් එම සිදුවීම් පසුකාලීන සිදුවීම්වලට ගැළපෙන පරිදි වෙනස් කර ඇත. තාරකාවල ඇති අසාමාන්‍යතාවලට ප්‍රධාන වශයෙන් සූර්යග්‍රහණ, චන්ද්‍රග්‍රහණ, වල්ගාතරු, උල්කාපාත සහ විවිධ ග්‍රහලෝකවල පෙනුම ඇතුළත් වේ. විවිධ ග්‍රහලෝකවල පිහිටීම් ද එයට බලපානු ලැබේ. උදාහරණයක් ලෙස, බ්‍රහස්පති ග්‍රහයා හෘද රාශියේ සිටින විට, අනෙක් ග්‍රහලෝක හතර සිටින්නේ කුමන තාරකා රාශියේද, ඒවා අතර කුමන ආකාරයේ ජ්‍යාමිතික හැඩතල සෑදෙන්නේද, යන්න වැදගත්ය. මේ ආකාරයේ ඡ්‍යොතිෂයේ යාන්ත්‍රණය දේශීය හා විදේශීය වශයෙන් අනුකූල වේ, මේ තරු බොහොමයක් අඳුරු තාරකා වන අතර, පළමු විශාලතම දීප්තිමත් තාරකාවක් වන්නේ ‘ස්පිකා’ පමණි.

කන්‍යා රාශියේ පිහිටා ඇති ස්පිකා, අහසේ දහසයවන දීප්තිමත්ම තාරකාවයි. මෑත වසරවල ඡ්‍යොතිෂ ශාස්ත්‍රඥයින් විසින් කරන ලද පර්යේෂණයන්ට අනුව, ජන්ම පත්‍රයට වැඩිම බලපෑමක් ඇති තරු වන්නේ දීප්තිමත්ම සහ සූර්යග්‍රහණයට ආසන්න තාරකා බව සොයාගෙන ඇත. පියවි ඇසින් දැකිය හැකි දීප්තිමත්ම තරු දුසිමක් හෝ ඊට වැඩි ප්‍රමාණයක් හඳුන්වන්නේ පළමු විශාලත්වයේ තරු ලෙසයි. මේ දීප්තිමත් තරුවලින් නිකුත් වන ආලෝකය පුද්ගලයෙකුගේ ජන්ම පත්‍රයට තීරණාත්මක බලපෑමක් ඇති කරන බව පිළිගැනේ.

CAPTCHA
This question is for testing whether or not you are a human visitor and to prevent automated spam submissions.
9 + 1 =
Solve this simple math problem and enter the result. E.g. for 1+3, enter 4.